Министерството за одбрана информира дека неодамнешниот случај на двајца професионални војници заболени од инфективната болест шуга (scabies) не потекнува од касарната „Алексо Демниевски Бауман“ во Велес, спротивно на шпекулациите во јавноста.
Од Министерството нагласуваат дека болеста се пренесува само преку директен контакт со заразено лице или преку заеднички користена постелнина, пешкири и слично. Пред приемот на новите професионални војници, просториите биле целосно дезинфицирани и снабдени со чисти и испрани постелнини и ќебиња.
“Одделението за превентивна заштита од Воено-медицинскиот центар изврши епидемиолошки надзор, а сите војници кои биле во контакт со заразените се упатени на превентивен преглед. Досега се регистрирани четири случаи, на кои им е дадена соодветна медицинска терапија”, велат од Министерството.
Синдикатот на професионални војници алармираше дека во касарната има лоши услови за живот и работа, со влага, старо постелнино и руинирани тоалети, што според нив придонело до појава на заболувањето. Министерството тврди дека состојбата се следи и дека се преземаат мерки согласно насоките на епидемиолог.
“Министерството апелира случајот да не се злоупотребува за манипулирање на јавноста и нагласува дека вакви инциденти не се регистрирани во другите центри за обука на Армијата”, се додава во соопштението.