Албанскиот премиер Еди Рама изјави дека проектот за развој на островот Сазан е изменет и нема да доведе до затворање на островот за јавноста, отфрлајќи шпекулации дека тој ќе стане ексклузивен приватен комплекс.
Рама рече дека преговорите за инвестицијата, во која се вклучени компании поврзани со семејството на американскиот претседател Доналд Трамп, сè уште не се завршени, но нагласи дека албанската држава ќе биде дел од заедничката компанија што ќе го развива и управува проектот.
„Не станува збор за продажба на островот, ниту за негово затворање. Проектот е променет и ќе има многу малку градби“, изјави Рама.
Тој додаде дека Сазан нема да биде „привилегиран затворен резорт“, туку ќе остане достапен и за други туристи.
Во пресрет на летната туристичка сезона, премиерот ги повика бизнисите во Влора да бидат внимателни со цените, предупредувајќи дека високите трошоци може да доведат до намалување на бројот на туристи.
„Цените мора да бидат во баланс со квалитетот на услугата“, рече Рама, додавајќи дека чистотата на градот треба да биде заедничка одговорност и на институциите и на приватниот сектор.
Тој исто така посочи дека побарувачката за недвижности во регионот расте и прогнозираше дека вредноста на имотите во Влора ќе продолжи да се зголемува во следните пет години.
Рама нагласи дека, покрај хотелите, нови можности за профит се појавуваат и во инфраструктурата, особено во изградба на паркинзи, поради зголемениот број туристи и инвеститори во крајбрежниот регион.