Американски претставници ќе отпатуваат во Пакистан за нова рунда разговори со Иран, иако Техеран соопшти дека не планира директни средби со САД, туку ќе комуницира преку посредници.
Иранскиот министер за надворешни работи Абас Арагчи веќе се наоѓа во Пакистан, но според портпаролот на иранското министерство Есмаил Багаеи, тој ќе има разговори само со пакистански високи претставници.
Иранските државни медиуми наведуваат дека Пакистан може да дејствува како „мост“ за пренесување на позициите на Техеран во обидите за ставање крај на конфликтот.
Белата куќа соопшти дека специјалниот пратеник Стив Виткоф и советникот Џаред Кушнер ќе пристигнат во Исламабад за разговори, додека потпретседателот Џеј-Ди Венс е подготвен да се приклучи доколку биде потребно.
Сепак, неизвесно е колкав напредок може да се постигне, со оглед на тоа што Иран инсистира комуникацијата да се одвива индиректно, преку пакистански посредници.
Разговорите беа одложени претходно оваа недела, откако Иран сигнализираше дека не е подготвен да учествува поради американската блокада на неговите пристаништа.
Во меѓувреме, американскиот претседател Доналд Трамп ја продолжи важноста на прекинот на огнот за да се овозможи повеќе време за дипломатски напори.
Паралелно, борбите меѓу израелската армија и Хезболах продолжуваат, при што двете страни меѓусебно се обвинуваат за прекршување на неодамна продолжениот прекин на огнот.
Пакистан, кој посредува во процесот, воведе засилени безбедносни мерки во Исламабад, вклучително и затворање на клучни патишта, во пресрет на можните разговори.
И покрај продолжувањето на дипломатските контакти, аналитичарите оценуваат дека пробив во преговорите останува малку веројатен на краток рок.