Советот за регионална соработка ги отвори номинациите за избор на Жени претприемачи на годината од Западен Балкан за 2026 година, повикувајќи институции, организации и поединци да предложат кандидатки чии бизниси придонесуваат за иновации, конкурентност и инклузивен економски раст.
Номинациите ќе бидат отворени до 14 мај, а ќе бидат избрани шест претприемачки од регионот, со цел да се истакне улогата на бизнисите водени од жени во економскиот развој, создавањето работни места и регионалната соработка.
„Жените претприемачи создаваат поотпорни и иновативни економии низ регионот,“ изјави Амер Капетановиќ, додавајќи дека иницијативата има за цел да ги промовира нивните приказни и да го поттикне економското зајакнување на жените.
Номинации можат да поднесуваат јавни и приватни институции, стопански комори, бизнис асоцијации, невладини организации и поединци. Кандидатките треба да бидат жени од Западен Балкан Шест со регистриран бизнис кој функционира најмалку една година.
Признанијата ќе се доделуваат во шест категории: зелено претприемништво, креативни индустрии, информациско-комуникациски технологии, туризам, млади претприемачи и социјално претприемништво. Жири-комисијата може да додели и специјално признание.
Апликациите ќе ги оценува независна комисија врз основа на влијание, иновативност и придонес кон економијата, со фокус на резултатите постигнати во 2025 година.
Победничките ќе бидат објавени на 30 јуни во Сараево, на церемонија што ќе се одржи паралелно со регионалниот форум за родова еднаквост.
Освен признанието, добитничките ќе добијат регионална видливост, промоција и можности за вмрежување во рамки на иницијативите поддржани од RCC.