Цените на нафтата скокнаа на највисоко ниво од 2022 година, откако беше објавено дека американската војска подготвила нови опции за можни дејства во војната со Иран.
Цената на нафтата „брент“ порасна за речиси 7 проценти, надминувајќи 126 долари за барел, што е највисоко ниво од почетокот на руската инвазија врз Украина во 2022 година.
Според извештаи, американската Централна команда подготвила план за кратки и силни удари врз Иран, со цел да се надмине застојот во преговорите со Техеран. Планот, според изворите, би можел да вклучи напади врз инфраструктурни цели.
Друг разгледуван план се однесува на преземање контрола врз дел од Ормускиот Теснец, со цел повторно отворање на поморскиот коридор за комерцијален сообраќај. Таквиот потег би можел да вклучи и распоредување копнени сили.
Цените на енергенсите растат цела недела, откако мировните разговори со Иран влегоа во застој, а Ормускиот Теснец остана практично затворен за голем дел од поморскиот сообраќај.
Преку теснецот вообичаено минува околу една петтина од светските енергетски испораки, што го прави една од најчувствителните точки за глобалниот пазар на нафта.
Американската нафта ВТИ исто така поскапе, достигнувајќи околу 109 долари за барел.
САД претходно соопштија дека ќе ја продолжат блокадата на иранските пристаништа сè додека Техеран се заканува на бродовите што се обидуваат да го користат Ормускиот Теснец.
Пазарите стравуваат дека продолжена блокада или нови воени удари би можеле дополнително да го нарушат снабдувањето со енергенси и да го зголемат притисокот врз глобалната инфлација.