Демократската унија за интеграција соопшти дека објавува нови информации поврзани со директорот на НОМАГАС, Недим Рама, отворајќи, како што наведуваат, „сериозни прашања“ за потеклото на неговиот капитал и имот.
Од ДУИ тврдат дека компанијата „LINE LTD DOO Skopje“, која е во сопственост на Недим Рама и партискиот донатор на ВЛЕН, Анид Шазивари, е регистрирана за изнајмување возила и се наоѓа на официјалната листа на rent-a-car компании на Меѓународниот аеродром Скопје.
„Го прашуваме Недим Рама: со каков капитал и од кои извори се обезбедени средствата за набавка на овие возила и колкава е нивната вредност?“, наведуваат од партијата.
ДУИ дополнително тврди дека преку истата бизнис-структура се издаваат и луксузни апартмани во Маврово.
Според партијата, по извршен увид во катастарските податоци, два апартмани се поврзуваат со Недим Рама – едниот во негова лична сопственост, а другиот во сопственост на компанијата „LINE LTD DOO Skopje“.
Во едниот имотен лист, како косопственик се споменува и Лирим Хајредини, со идеален дел од половина од имотот заедно со Недим Рама.
„Се поставуваат легитимни прашања: како е можно државен функционер да располага со капитал за флота возила за rent-a-car компанија и со недвижности со висока вредност? Од кои извори се обезбедени средствата за овие инвестиции?“, прашуваат од ДУИ.
Партијата отвора и политичка димензија на случајот, прашувајќи дали зад, како што велат, „брзиот раст на капиталот и деловните активности“ стои поширока политичко-бизнис мрежа блиска до Изет Меџити.
„Јавноста има право да знае дали Недим Рама дејствува како поединец или е дел од поширок круг на влијание и интереси“, додаваат од ДУИ.
Партијата ги повика Управата за финансиска полиција, Основното јавно обвинителство и Државната комисија за спречување на корупцијата да спроведат детална проверка на потеклото на капиталот, финансиските текови и целокупната имотна состојба.
„Граѓаните имаат право на одговори. Транспарентноста не смее да биде селективна, особено кога станува збор за јавни функционери“, наведуваат од ДУИ.