Нови меѓусебни обвинувања за реформската агенда и евроинтеграциите беа разменети меѓу СДСМ и премиерот Христијан Мицкоски, откако двете страни изнесоа спротивставени ставови за напредокот на земјата.
Од СДСМ обвинуваат дека премиерот однапред подготвува алиби за евентуален неуспех во реформите, тврдејќи дека вината ќе ја префрли врз опозицијата, особено во делот на донесувањето на Изборниот законик.
Според партијата, власта располага со парламентарно мнозинство и може самостојно да носи закони, па затоа, како што наведуваат, не ѝ е потребна поддршка од опозицијата, туку изговор за евентуален неуспех.
Во реакцијата се додава дека најавите за брз напредок кон Европската Унија не се реални и дека нема доволно резултати во клучните реформски области.
Од друга страна, премиерот Мицкоски тврди дека реформската агенда се реализира без застој и дека е постигнат значителен напредок.
„Не само што нема застој, туку има напредок. Од последно место, сега сме рамо до рамо со т.н. фронт-ранери“, изјави Мицкоски, обвинувајќи ја опозицијата дека преку „шпекулации и лаги“ се обидува да ја дискредитира работата на Владата.
Тој најави дека до крајот на јуни ќе бидат реализирани најголем дел од заостанатите реформски обврски, освен две – едната поврзана со енергетската политика, а другата со Изборниот законик.
За Изборниот законик, премиерот посочи дека е потребен политички консензус и дека неговото донесување е блокирано поради повлекувањето на СДСМ од работната група.
Политичката реторика меѓу власта и опозицијата се засилува во пресрет на клучните рокови за реформите, при што двете страни меѓусебно се обвинуваат за евентуален застој во евроинтегративниот процес.