Претседателката Гордана Сиљановска-Давкова, претседателот на Собранието Африм Гаши и премиерот Христијан Мицкоски денеска упатија честитки по повод 24 Мај – Денот на сесловенските просветители Светите Кирил и Методиј.
Во пораките тие го истакнаа значењето на делото на светите браќа за македонскиот јазик, култура, духовност и национален идентитет.
Сиљановска-Давкова оцени дека делото на Кирил и Методиј претставува историско и цивилизациско наследство со обединувачка моќ за словенските народи.
„Јазикот не е само збир на зборови, туку и колективна меморија“, порача претседателката, додавајќи дека без култура, образование и вредносен систем не може да се изгради доверба и заедништво во едно општество.
Премиерот Мицкоски порача дека делото на Светите Кирил и Методиј останува темел на духовниот и културниот идентитет и повика на зачувување на јазикот и националните вредности.
Претседателот на Собранието, Африм Гаши, во честитката истакна дека просветителската мисија на Кирил и Методиј и денес претставува инспирација за знаење, дијалог и меѓусебно почитување.
По повод празникот честитки упатија и политичките партии, како и Министерството за образование и наука.
Од Министерството за образование и наука порачаа дека Светите Кирил и Методиј оставиле траен белег врз духовниот, културниот и образовниот развој на словенските народи.
„Наша обврска е да градиме силен образовен систем кој ќе создава генерации со знаење“, наведоа од Министерството.
Лидерот на СДСМ, Венко Филипче, повика на зачувување на македонскиот јазик и обезбедување европска иднина за државата.
Од ВМРО-ДПМНЕ соопштија дека делото на Кирил и Методиј е длабоко вкоренето во македонската национална историја и претставува светлина што треба да се чува и негува.