Претседателот на Европскиот совет, Антонио Кошта, следната недела ќе ја посети Северна Македонија во рамки на неговата турнеја низ Западен Балкан, соопшти Европскиот совет.
Кошта од 1 до 5 јуни ќе ги посети шесте партнери од регионот пред Самитот ЕУ–Западен Балкан, кој ќе се одржи на 5 јуни во Тиват, Црна Гора. Главни теми на разговорите ќе бидат проширувањето на Европската унија, постепената интеграција, регионалната соработка, безбедноста и стабилноста.
Во Скопје, Кошта ќе престојува на 2 јуни, каде што ќе се сретне со премиерот Христијан Мицкоски. По средбата е предвидена и заедничка прес-конференција.
„Мојата втора турнеја низ Западен Балкан испраќа јасен сигнал: посветеноста на ЕУ кон регионот е реална, исто како и можноста за проширување. Моментумот постои. Сега е време за испорака на резултати“, порача Кошта.
Во пресрет на посетата, Мицкоски изјави дека досегашните разговори со претседателот на Европскиот совет биле пријателски и конструктивни.
Според премиерот, Кошта покажал подготвеност да се бара решение за, како што рече, „вештачкото и билатерално барање на една земја членка кон Македонија“.
„Би било некултурно да се очекува ставот да се промени преку ноќ, бидејќи не се исполнети предусловите што ги очекуваме и ги заслужуваме“, рече Мицкоски.
Тој повтори дека Владата нема да прифати отстапки што би го засегнале македонскиот национален идентитет.
„Државата даде многу во изминатите децении, а не доби ништо за возврат“, изјави премиерот, додавајќи дека Владата ќе бара решение за европската интеграција, но без нови отстапки и без јасни гаранции за напредок во преговарачкиот процес.
Турнејата на Кошта ќе започне во Сараево, а ќе продолжи во Тирана, Скопје, Приштина, Белград и Тиват, каде што ќе копретседава со Самитот ЕУ–Западен Балкан заедно со претседателката на Европската комисија Урсула фон дер Лајен и претседателот на Црна Гора, Јаков Милатовиќ.