Политичките тензии меѓу ДУИ и коалицијата ВЛЕН се интензивираат со меѓусебни обвинувања поврзани со работењето на МЕПСО, спорни договори и наводни финансиски штети.
Од ДУИ обвинија дека функционерот Бурим Латифи „молчи и се крие“ во врска со, како што наведуваат, штета од околу 6 милиони евра за државата. Според партијата, јавноста има право да знае зошто е раскинат договорот со првата компанија и врз која основа е склучен нов договор со фирма од Бања Лука.
„Транспарентноста и одговорноста се обврска. Молкот во овој случај само ги зголемува сомнежите“, соопштија од ДУИ, повикувајќи го Јавното обвинителство и Антикорупциската комисија да го истражат случајот.
Партијата, исто така, изрази загриженост за можни врски на новата компанија со политички структури од Република Српска, наведувајќи дека тоа отвора сериозни прашања за јавниот интерес.
Од друга страна, ВЛЕН возврати со обвинувања дека ДУИ со години штитела приватни интереси преку, како што тврдат, „сомнителни договори“ и фиктивни анекси.
Во нивното соопштение се наведува дека милиони евра од граѓаните завршиле кај лица и компании блиски до раководството на ДУИ, при што го споменуваат и проектот за интерконекција со Албанија, кој, според нив, бил блокиран повеќе години.
„Ова не е реализација – ова е систем за извлекување пари“, наведуваат од ВЛЕН, додавајќи дека компанијата поврзана со претходниот договор реализирала само околу 4% од проектот за повеќе од пет години.
ВЛЕН исто така поставува прашања за поврзаноста меѓу одлуките во МЕПСО, промените во сопственоста на одредени компании и изборот на нови изведувачи, повикувајќи на целосна истрага.
Дополнително, тие тврдат дека раскинувањето на спорниот договор било извршено по детална форензичка анализа и во согласност со процедурите на Европската банка за обнова и развој.