Полска ќе побара објаснување од Унгарија и Соединетите Американски Држави за тоа како поранешниот министер за правда Збигњев Зиобро успеал да отпатува во САД, иако е баран по обвиненија за злоупотреба на службената положба, објави Ројтерс.
Зиобро и неговиот заменик Марчин Романовски добија азил во Унгарија од владата на Виктор Орбан. Полските власти се надеваа дека по изборниот пораз на Орбановиот сојузник и победата на проевропскиот политичар Петер Маѓар, двајцата ќе бидат вратени во Полска.
„Ќе побараме од САД и Унгарија правна и фактичка основа врз која Збигњев Зиобро ја напуштил унгарската територија“, изјави портпаролот Маќеј Вевјор.
Тој додаде дека Варшава сака да знае со каков документ Зиобро ја преминал границата и влегол во САД, имајќи предвид дека нему и на Романовски им биле одземени пасошите.
Американската амбасада во Варшава и унгарското Министерство за надворешни работи засега не одговориле на барањата за коментар.
Зиобро во неделата за приватната телевизија „ТВ Република“ потврди дека се наоѓа во САД. Телевизијата, блиска до националистичката партија Право и правда (PiS), соопшти дека тој ќе работи како политички коментатор.
Поранешниот министер се смета за архитект на судските реформи на владата на PiS, за кои Европската унија оцени дека ја нарушиле независноста на судството во Полска.
Тој се соочува со 26 обвиненија, главно поврзани со злоупотреба на средства од фонд наменет за помош на жртви на криминал, кои според обвинителството биле користени за политички цели.
Случајот со Збигњев Зиобро е уште еден пример на политичари и функционери кои добиле заштита во Унгарија под владата на Виктор Орбан. Најпознат е случајот на поранешниот македонски премиер Никола Груевски, кој во 2018 година избега во Унгарија и доби политички азил, иако во Северна Македонија беше осуден на затвор.
Во последните години Будимпешта даде азил и на поранешниот полски заменик-министер за правда Марчин Романовски, близок соработник на Зиобро, против кого во Полска се водат истраги за злоупотреба на државни фондови.
Овие случаи предизвикаа критики од земјите членки на Европската Унија и дополнително ги засилија обвинувањата дека владата на Орбан ја користи институцијата политички азил како средство за заштита на идеолошки и политички сојузници.