СДСМ обвини дека Владата предводена од Христијан Мицкоски ја задолжува државата со „невидено темпо“, наведувајќи дека во првите три месеци од годинава се создадени нови 700 милиони евра долг.
Од опозициската партија тврдат дека во изминатите две години јавниот долг е зголемен за околу 2,3 милијарди евра, достигнувајќи ниво од 10,7 милијарди евра, што според нив претставува историски максимум.
„Станува збор за нето задолжување, односно нов долг создаден од актуелната власт“, велат од СДСМ.
Партијата додава дека, паралелно со зголеменото задолжување, не се реализираат политики за подобрување на животниот стандард, посочувајќи дека нема зголемување на платите, ниту мерки за справување со растот на цените.
Дополнително, СДСМ наведува дека буџетскиот дефицит за првиот квартал изнесува 408 милиони евра, а реализацијата на приходите е околу 20 проценти, што, според нив, укажува на слабости во управувањето со јавните финансии.
Од партијата оценуваат дека економските политики на Владата се неодржливи и предупредуваат дека ваквиот тренд може да доведе до дополнителни финансиски ризици.