Американското Министерство за одбрана објави 161 декласифициран документ поврзан со НЛО, необјаснети воздушни феномени и можен вонземски живот, по наредба на претседателот Доналд Трамп.
Документите, кои опфаќаат повеќе децении, содржат воени извештаи, сведоштва од цивили, снимки од Блискиот Исток и комуникации од американските мисии на Месечината.
Пентагон најави дека наскоро ќе бидат објавени и дополнителни материјали.
Меѓу најинтересните делови се декласифицираните транскрипти од мисиите Аполо 11, Аполо 12 и Аполо 17.
Астронаутот Баз Олдрин од мисијата Аполо 11 во интервју од 1969 година изјавил дека видел „силен извор на светлина“ за време на патувањето кон Месечината.
Во документите се наведува дека астронаутот Алан Бин од Аполо 12 видел „честички и светлечки блесоци“ кои изгледале како да „излегуваат од Месечината“.
Двајца астронаути од мисијата Аполо 17 во 1972 година исто така пријавиле светлечки феномени.
„Изгледа како 4 Јули таму надвор“, изјавил астронаутот Џек Шмит, според транскриптите.
Во друг документ, аудио-снимка од мисијата Gemini 7 од 1965 година содржи разговор меѓу астронаутот Френк Борман и контролата на летот, при што тој пријавува „неидентификуван објект“ и „трилиони мали честички“ покрај леталото.
Документите содржат и бројни сведоштва од цивили за мистериозни летечки објекти.
Во еден извештај од 1957 година, сведок му кажал на ФБИ дека видел големо кружно летало како се издигнува над земјата.
Во понови извештаи од 2023 година, американски граѓани опишуваат метални објекти што лебделе во воздухот и се појавувале од силна светлина.
Објавени се и видеа снимени од американската војска над Ирак, Сирија и Обединетите Арапски Емирати во 2022 година.
Пентагон ги опишува снимките како „неразјаснети необјаснети воздушни феномени“.
На едно видео се гледа овален објект што се движи со голема брзина, а во извештајот е означен како „можен проектил“.
Републиканскиот конгресмен Тим Бурчет оцени дека објавувањето на документите е „одличен почеток“, додека конгресменката Ана Паулина Луна го нарече потегот „голем чекор во вистинската насока“.
Поранешната конгресменка Марџори Тејлор Грин, пак, оцени дека објавувањето на НЛО-документите е одвлекување внимание од поважни теми како инфлацијата и војната со Иран.
Интересот за НЛО во САД повторно се зголеми во последните години, особено по јавните сослушувања во Конгресот и ветувањата на Пентагон за поголема транспарентност околу необјаснетите воздушни феномени.