Претставници на владејачката партија ВРЕДИ во неделата објавија дека наскоро ќе биде овозможено полагање на правосудниот испит на албански јазик, во момент кога се зголемуваат политичките тензии околу најавениот протест на албанските студенти.
Првиот заменик-премиер Беким Сали изјави дека владата решава прашање кое, според него, останало нерешено повеќе од две децении за време на владеењето на ДУИ.
„Правото на јазик е основно човеково право за кое нема компромис“, напиша Сали, најавувајќи „добри вести“.
Со идентична порака настапија и лидерите на ВРЕДИ, Изет Меџити и Билал Касами, кои објавија дека правосудниот испит ќе може да се полага и на албански јазик.
Објавите доаѓаат еден ден пред протестот на албанските студенти, за кој дел од функционерите на ВРЕДИ тврдат дека е политички мотивиран и поддржан од ДУИ.
Од ДУИ засега нема официјални реакции во врска со протестите.
Лидерот на партијата Али Ахмети во саботата, на изборен собир на огранокот во Тетово, испрати порака за партиско единство и организациска подготвеност.
Ахмети оцени дека ДУИ останува „најорганизираната и најподготвената политичка сила во државата“, додавајќи дека Тетово испратило „силна порака“ и дека „нови победи доаѓаат“.
Во политичките кругови, молкот на ДУИ околу студентските протести се толкува како стратегија за избегнување директна политичка конфронтација пред протестот.