Американскиот секретар за одбрана Пит Хегсет упати нови критики кон европските сојузници поради недоволните инвестиции во одбраната, додека претставници на НАТО и европските влади настојуваа да ги уверат партнерите дека Алијансата останува стабилна и покрај растечките трансатлантски тензии.
Говорејќи на безбедносниот форум „Шангри-Ла дијалог“ во Сингапур, Хегсет ги пофали азиските партнери за зголемувањето на воените буџети и поблиското усогласување со Вашингтон во услови на растечки тензии со Кина.
„Кога нашите интереси се усогласени, дејствуваме заедно со одлучност. Кога се разликуваат, се прилагодуваме прагматично, без драма и морализирање. Мислам дека Западна Европа треба да го забележи тоа“, рече Хегсет.
Тој додаде дека Европа и НАТО се соочуваат со важни одлуки во време кога администрацијата на американскиот претседател Доналд Трамп бара сојузниците да ги зголемат одбранбените трошоци на 3,5 проценти од бруто-домашниот производ.
Вашингтон минатиот месец најави повлекување на околу 5.000 американски војници од Германија, потег што предизвика загриженост во дел од европските престолнини.
Претседателот на Воениот комитет на НАТО, адмирал Џузепе Каво Драгоне, се обиде да ги намали стравувањата, оценувајќи дека повлекувањето било однапред планирано и нема да влијае врз кохезијата на Алијансата.
„Во зрела алијанса, ако еден сојузник треба да пренасочи дел од своите капацитети на друго место, останатите мора да бидат подготвени да го надоместат тоа“, рече тој.
Германскиот државен секретар за одбрана Нилс Хилмер изјави дека Берлин го забрзува зголемувањето на воените инвестиции независно од идните американски распореди во Европа.
„Знаеме дека ќе има промени. Затоа сме подготвени постепено да ја преземеме безбедноста во свои раце“, рече Хилмер.
Европските претставници исто така се обидоа да ги уверат азиските партнери дека НАТО останува релевантен фактор и надвор од евроатлантскиот простор.
Француската министерка за одбрана Катрин Вотрен изјави дека кредибилитетот на Европа во Азија зависи и од способноста да ја поддржи Украина во одбраната од руската агресија.
Норвешкиот министер за одбрана Торе Сандвик оцени дека безбедносните предизвици во Европа и Индо-Пацификот сè повеќе се поврзуваат, посочувајќи дека севернокорејски сили учествуваат во борбите во Украина.
Во меѓувреме, американски сенатори и членови на Конгресот присутни на форумот настојуваа да ги уверат европските и азиските партнери дека поддршката за сојузништвата има двопартиска поддршка во Вашингтон.
Сепак, дел од учесниците остануваат скептични околу темпото со кое Европа ја гради сопствената одбранбена автономија.
„Европа мора да научи да биде геополитички играч. Нема друг пат. Но тоа може да биде исклучително корисно и за партнерството со САД, бидејќи Вашингтон ќе ја почитува таквата европска решителност“, изјави поранешниот украински министер за надворешни работи Павло Климкин.