Европратеникот Илхан Ќучук изјави дека Бугарите мора да бидат дел од Уставот на Северна Македонија и да бидат признаени како државотворен народ, оценувајќи дека од тоа нема да има никакво отстапување.
Во интервју за бугарската национална телевизија БНТ, Ќучук рече дека францускиот предлог претставува „стратешка архитектура“ за модерните односи меѓу Софија и Скопје.
„Спогодбите треба да се исполнуваат. Францускиот предлог не е само документ, туку стратешка рамка за современите односи меѓу Бугарија и Северна Македонија“, изјави Ќучук.
Тој посочи дека вклучувањето на Бугарите во Уставот е предуслов, но не и единствено решение за проблемите на бугарската заедница во земјата.
„Самото впишување е предуслов од највисок уставен ранг, но потребни се сериозни инвестиции и од бугарска и од македонска страна за овие луѓе да можат слободно да живеат со својот идентитет и традиции“, рече европратеникот.
Ќучук оцени дека историските прашања треба да им се остават на историчарите, а политичарите да се фокусираат на актуелните теми како инфраструктурата, образованието и економската поврзаност.
„Ако се движиме само по линијата на историјата, нема да стигнеме никаде. Политичарите треба да ги решаваат денешните прашања“, рече тој.
Според него, потребно е да се надмине, како што кажа, „најтенката непријателска нишка на македонизмот насочена кон бугароомразата“.
Ќучук нагласи дека очекува нормализација на односите меѓу двете држави по формирањето стабилна влада во Бугарија.
„Секој се согласува со власт што има легитимитет. Сегашната власт во Бугарија има доволен легитимитет да ги брани бугарските национални интереси“, изјави европратеникот.
Тој додаде дека Европскиот парламент и натаму ќе инсистира Северна Македонија да ги исполни преземените обврски од преговарачката рамка со Европската Унија.