Соединетите Држави и Иран сигнализираа дека се блиску до договор за прекин на војната, додека нови воени инциденти во близина на Ормутскиот Теснец покажаа дека тензиите во регионот остануваат високи.
Висок претставник на американската администрација изјави дека двете страни се согласиле за текстот на договорот и дека Вашингтон очекува негово потпишување во наредните денови.
Иранскиот министер за надворешни работи Абас Арагчи изјави дека иако се можни дополнителни измени, привремениот договор покажува дека Техеран излегол посилен од конфликтот.
„Иран е победник во војната со САД“, изјави Арагчи за државната телевизија.
Само неколку часа подоцна, американските сили собориле повеќе ирански дронови кои се движеле кон Ормутскиот Теснец, соопшти извор запознаен со ситуацијата. Според американската Централна команда, дроновите претставувале закана за комерцијалниот бродски сообраќај, а пловниот пат останал отворен.
Според повеќе дипломатски и регионални извори, предложениот меморандум предвидува повторно отворање на Ормутскиот Теснец и укинување на американската поморска блокада врз иранските пристаништа.
Потоа би следувале преговори за иранската нуклеарна програма, која беше главната причина наведена од американскиот претседател Доналд Трамп за почетокот на конфликтот.
Нацрт-договорот предвидува САД постепено да ослободат милијарди долари замрзнати ирански средства и да ги олеснат санкциите за извозот на иранска нафта, во замена за гаранции дека Техеран ќе го одржува отворен Ормутскиот Теснец.
Сепак, остануваат значајни несогласувања околу иднината на иранската нуклеарна програма. Американската страна бара уништување на залихите високо збогатен ураниум и долгорочен инспекциски режим, додека Иран инсистира материјалот да биде само разреден и да остане под негова контрола.
Израел, кој не учествува во преговорите, соопшти дека нема да биде дел од евентуалниот договор.
Премиерот Бенјамин Нетанјаху е во судир со администрацијата на Трамп околу американските напори за ограничување на израелските воени операции во регионот.
Иран тврди дека договорот би можел да доведе и до крај на конфликтот во Либан, но израелскиот министер за одбрана порача дека Израел нема намера да се повлече од позициите што ги контролира.
Веста за можен мировен договор позитивно се одрази на финансиските пазари. Светските берзи пораснаа, додека цената на нафтата падна за повеќе од три проценти, достигнувајќи најниско ниво во последните два месеца.
Напредокот во преговорите доаѓа по една недела обележана со директни судири меѓу Иран, Израел и САД, кои предизвикаа стравувања од поширока регионална војна на Блискиот Исток.