Северна Македонија останува посветена на членството во Европската Унија, но очекува јасни гаранции дека процесот на пристапување нема повторно да биде блокиран од билатерални спорови, изјави министерот за надворешни работи и надворешна трговија Тимчо Муцунски по средбата со неговиот литвански колега Кестутис Будрис во Скопје.
Посетата на шефот на литванската дипломатија доаѓа во период кога Брисел повторно го става проширувањето високо на европската агенда, поттикнато од војната во Украина и пошироките геополитички предизвици.
„Ова е момент што мора да се искористи. Сите разбираме дека проширувањето на Европската Унија денес е водено од геополитичка потреба“, изјави Будрис, нагласувајќи дека процесот треба да остане заснован на заслуги и на исполнување на критериумите.
Литванскиот министер оцени дека, и покрај сложеноста на процесот, крајната цел за земјите кандидати мора да остане полноправното членство во Европската Унија.
Муцунски, од своја страна, порача дека Владата останува целосно посветена на европската интеграција, но дека искуството од изминатите години ја наметнува потребата од поголема предвидливост на процесот.
„Не сме лековерни и не сме наивни да мислиме дека одеднаш ќе има драматична промена на позициите. Потребно е да се работи на намалување на тензиите и да се обезбеди процес кој ќе се темели на европски вредности и мерит-критериуми, а не на билатерални прашања“, рече Муцунски.
Тој посочи дека дијалогот со Бугарија треба да продолжи со активна поддршка на земјите-членки и европските институции, со цел да се создадат услови за сигурен и предвидлив пат кон членството.
Изјавите доаѓаат во период кога Северна Македонија сè уште не ги започнала суштинските преговори со Европската Унија поради условот за уставни измени, додека владата во Скопје бара дополнителни политички гаранции дека нема да се соочи со нови барања во текот на пристапниот процес.
Поддршката од земји како Литванија покажува дека во рамките на Европската Унија постои обновен интерес за проширување, но останува неизвесно дали геополитичкиот моментум ќе биде доволен за надминување на долгогодишните билатерални спорови што го забавуваат европскиот пат на Северна Македонија.