Бугарската фондација „Македонија“ најави дека ќе изработи мапа на компании и деловни интереси за кои тврди дека се поврзани со премиерот на Северна Македонија, Христијан Мицкоски, и неговиот близок деловен круг во Бугарија, со цел да покрене кампања за нивен бојкот.
Претседателот на фондацијата, Виктор Стојанов, на прес-конференција во Софија изјави дека организацијата подготвува „национална карта“ на бизниси кои, според него, се поврзани со Мицкоски и работат во транспортниот сектор, транспортните услуги и трговијата со прехранбени производи во југозападна Бугарија.
„Картата ќе биде претставена пред бугарската јавност за да се знае кој е бизнисот на Мицкоски и како се финансира антибугарската пропаганда во Северна Македонија“, рече Стојанов, без да приложи докази за своите тврдења.
Тој најави дека по објавувањето на мапата ќе биде предложена национална кампања за бојкот на тие компании, како и поднесување претставки до надлежните бугарски институции.
Фондацијата истовремено ја откажа најавената блокада на трите гранични премини меѓу Бугарија и Северна Македонија – Ѓуешево-Деве Баир, Станке Лисичково-Делчево и Златарево-Ново Село – која требаше да се одржи на 21 јуни.
Според Стојанов, одлуката е донесена по реакциите на бугарскиот амбасадор во Скопје, Желјазко Радуков, и на бугарското Министерство за надворешни работи.
Тој ја обвини владата во Скопје за, како што рече, „системска антибугарска политика“ и „непријателска реторика“ кон Бугарија, наведувајќи дека таа се манифестира преку медиумите, институциите и судските постапки.
Стојанов ги спомена случаите со палењето на возила на бугарската амбасада во Скопје, постапките против активисти со бугарска самосвест и инциденти поврзани со бугарски граѓани во Северна Македонија.
И покрај критиките, тој рече дека фондацијата не се залага за затворање на границите.
„Сакаме границите да бидат отворени, па дури и да не постојат, за Бугарите и Македонците да можат слободно да комуницираат“, изјави Стојанов.