Полицијата го пронајде и идентификуваше 19-годишниот возач кој вчера удри тригодишно девојче во скопското село Визбегово и потоа избегал од местото на несреќата.
Според информациите од СВР Скопје, сообраќајната несреќа се случила на 19 јуни околу 19 часот, кога патничко возило удрило во детски велосипед управуван од тригодишно девојче од Скопје.
Во несреќата девојчето се здобило со тешки телесни повреди, кои биле констатирани во Комплексот клиники „Мајка Тереза“.
По несреќата, возачот го напуштил местото на настанот, по што полицијата презела мерки за негово пронаоѓање и расчистување на случајот.
Денеска полициски службеници од Одделението за увид на сообраќајни незгоди го пронашле возилото и го идентификувале возачот.
Станува збор за автомобил „Фолксваген Голф“ со скопски регистарски ознаки, управуван од Џ.Б. (19) од скопското село Добрино.
Од полицијата информираат дека над возилото бил извршен увид и фотографирање, а со возачот бил извршен службен разговор.
По целосното документирање на случајот ќе биде поднесен соодветен поднесок против возачот.
Засега не се соопштуваат дополнителни детали за здравствената состојба на повреденото девојче.