Српската нафтена компанија НИС, која е во мнозинска сопственост на руските компании „Гаспром нефт“ и „Гаспром“, поднесе ново барање до американските власти за продолжување на изземањето од санкциите по 1 јули, кога истекува сегашниот рок, објави компанијата во петокот.
Без ново одложување од Канцеларијата за контрола на странски средства (OFAC) при американското Министерство за финансии, НИС нема да може да увезува и преработува сурова нафта, што би можело сериозно да го наруши снабдувањето на српскиот пазар, каде компанијата обезбедува до 80 проценти од потребите за гориво.
Во барањето доставено до OFAC, НИС наведе дека продолжувањето на изземањето е неопходно за „редовното функционирање на компанијата и уредното снабдување на домашниот пазар“, истовремено посочувајќи дека се водат напредни преговори за промена на сопственичката структура.
САД воведоа санкции против НИС во октомври минатата година поради руската сопственост во компанијата, како дел од поширокиот пакет мерки против рускиот енергетски сектор по инвазијата врз Украина.
Вашингтон подолг период врши притисок за намалување на рускиот удел во НИС, додека компанијата досега обезбедуваше привремени изземања од санкциите.
Според Ројтерс, американските власти исто така му дадоа рок до 1 јули на унгарскиот енергетски гигант МОЛ за завршување на преговорите за преземање на 56,15 проценти од акциите на НИС што ги поседуваат „Гаспром нефт“ и „Гаспром“. Србија поседува 29,9 проценти од компанијата.
Исходот од преговорите се смета за клучен за енергетската стабилност на Србија, која во голема мера зависи од работењето на единствената домашна рафинерија во Панчево.