Бугарската новинска агенција БГНЕС објави видео-снимки од палењето на две возила во сопственост на Амбасадата на Бугарија во Скопје, на кои се гледа лице кое истура запалива течност врз автомобилите пред да ги запали.
Според БГНЕС, лицето мирно се приближува до возилата, истура течност и го напушта местото без да покажува знаци на вознемиреност.
Бугарскиот медиум тврди дека пред амбасадата имало полициско обезбедување, но дека не било забележано непосредно реагирање за време на инцидентот.
Министерството за надворешни работи и надворешна трговија на Северна Македонија го осуди палењето на дипломатските возила, оценувајќи го како сериозен и неприфатлив чин.
Од Министерството соопштија дека Министерството за внатрешни работи презема мерки за расчистување на случајот и утврдување на сите околности поврзани со инцидентот.
Засега нема официјални информации за сторителот или за можните мотиви за нападот.