Косовскиот премиер во технички мандат Албин Курти изјави дека односите со албанскиот премиер Еди Рама се добри, но призна дека меѓу нив постојат значајни разлики, особено во однос на пристапот кон официјален Белград.
Во изјава за косовските медиуми, Курти рече дека не чувствува одговорност за заладувањето на односите меѓу Приштина и Тирана, нагласувајќи дека секогаш дејствувал со добра намера.
„Односите со Рама се добри, но тоа не значи дека се согласуваме за сите прашања. Особено се разликуваме во односот кон официјален Белград, бидејќи ние имаме поинаква чувствителност“, изјави Курти.
Тој потсети дека заедничката седница на владите на Косово и Албанија, планирана за летото 2023 година, не била откажана од Приштина, туку од Тирана.
Според Курти, соработката меѓу двете земји треба да продолжи преку редовни состаноци и координација меѓу ресорните министри.
Односите меѓу Курти и Рама беа ставени на тест во последните години поради различните ставови околу дијалогот меѓу Косово и Србија, како и поради откажувањето на заедничката владина седница во 2023 година, што предизвика политички реакции од двете страни.