Француската морнарица задржа танкер поврзан со Русија во Атлантскиот Океан во рамки на меѓународна операција насочена против таканаречената „сенка флота“ што Москва ја користи за транспорт на нафта и заобиколување на западните санкции, соопшти францускиот претседател Емануел Макрон.
Танкерот „Тагор“ бил пресретнат во неделата во меѓународни води, повеќе од 400 наутички милји западно од Бретања, со поддршка од Велика Британија и други сојузнички земји, соопшти Елисејската палата.
Макрон на социјалните мрежи објави видео од операцијата и порача дека Франција ќе продолжи да дејствува против бродови за кои постои сомневање дека ги прекршуваат меѓународните санкции воведени кон Русија поради војната во Украина.
Западните земји во последните месеци ги засилија активностите против мрежата на стари танкери, позната како „сенка флота“, која според нив се користи за транспорт на руска нафта надвор од официјалните канали и ограничувањата наметнати од Европската унија и групата Г7.
Операцијата претставува најнов во серијата потези на европските држави против пловила осомничени за избегнување на санкциите. Во претходните месеци Велика Британија, Франција и други сојузници презедоа слични мерки против бродови за кои се верува дека се дел од руската мрежа за извоз на енергенси.
Русија претходно ги отфрли ваквите обвиненија и предупреди дека западните акции против нејзините бродови претставуваат закана за слободата на пловидба и меѓународната трговија.
Француските власти засега не соопштија дополнителни детали за товарот на танкерот, ниту за понатамошната постапка против бродот.