Израел соопшти дека ќе ги обнови нападите врз упориштата на Хезболах во јужните предградија на Бејрут, откако неколкунеделното ограничување на операциите во либанската престолнина не доведе до намалување на ракетните и беспилотните напади врз северен Израел.
Израелскиот премиер Бенјамин Нетанјаху и министерот за одбрана Израел Кац соопштија дека армијата добила наредба да нападне цели на Хезболах во квартот Дахије, кој се смета за главно упориште на шиитската групација во Бејрут.
„Нема да дозволиме нашите градови и граѓани да бидат напаѓани, додека командните центри на Хезболах во Бејрут остануваат недопирливи“, соопштија двајцата функционери.
По најавата, либанските медиуми објавија снимки од жители кои го напуштаат јужниот дел на Бејрут, додека на излезните патишта се формираа долги колони возила.
Ескалацијата доаѓа во момент кога Соединетите Држави се обидуваат да посредуваат за нов договор за деескалација. Според американски претставник, државниот секретар Марко Рубио разговарал со либанскиот претседател Џозеф Аун и со израелскиот премиер Нетанјаху за предлог според кој Хезболах прво би ги запрел нападите врз Израел, а Израел би се воздржал од натамошна ескалација во Бејрут.
Либанскиот претседател се обидел да го придвижи предлогот, но претседателот на парламентот Набих Бери, сојузник на Хезболах, инсистирал Израел прв да ги запре нападите, што американската страна го оцени како разочарувачки одговор.
Американски претставници оценија дека Хезболах продолжува да дејствува во согласност со интересите на Иран и покажува мал интерес за постигнување трајна деескалација.
Во меѓувреме, Израел ја прошири својата копнена операција во јужен Либан и соопшти дека ја презел контролата врз стратешки важната тврдина Бофор. Израелската армија потврди дека еден војник загинал, а тројца се повредени во напад со беспилотно летало на Хезболах во близина на новоосвоената позиција.
Советот за безбедност на Обединетите нации треба да одржи вонредна седница посветена на ситуацијата во Либан, по барање на Франција. Францускиот претседател Емануел Макрон оцени дека „ништо не ја оправдува големата ескалација“ во јужен Либан и повика на итен прекин на непријателствата.
Германија и Велика Британија исто така изразија загриженост поради проширувањето на израелската офанзива, предупредувајќи дека натамошната ескалација може да предизвика нов бран раселувања и дополнително да ги поткопа дипломатските напори.
Паралелно со кризата во Либан, американскиот претседател Доналд Трамп изјави дека Иран е заинтересиран за постигнување договор со Вашингтон и ги повика критичарите да покажат трпение додека продолжуваат преговорите околу иранската нуклеарна програма.
„Иран навистина сака договор и верувам дека тој ќе биде добар за САД и за нашите сојузници“, напиша Трамп на својата социјална мрежа, додавајќи дека јавните притисоци и политичките критики ја отежнуваат преговарачката позиција на администрацијата.
Судирите меѓу Израел и Хезболах продолжуваат и покрај прекинот на огнот што беше прогласен во април, додека дипломатските напори за трајно решение засега не даваат резултати.