Турција ќе воведе засилени безбедносни мерки во главниот град пред самитот на НАТО што ќе се одржи на 7 и 8 јули, а американски претставници го опишаа како еден од најважните состаноци во историјата на Алијансата.
Според турските власти, во Анкара ќе бидат воведени ограничувања во воздушниот сообраќај, затворања на патишта и засилени контроли околу клучните локации каде ќе престојуваат светските лидери.
Воздушниот простор над градот ќе биде обезбедуван со системи за противвоздушна одбрана и борбени авиони Ф-16, додека областите околу Претседателскиот комплекс, аеродромите Есенбога и Етимесгут, како и хотелите во кои ќе бидат сместени делегациите, ќе бидат прогласени за зони со највисок степен на безбедност.
Турските медиуми јавуваат дека околу 40.000 полицајци и припадници на жандармеријата ќе бидат ангажирани за обезбедување на самитот.
Властите најавија и забрана за сите јавни собири, протести и маршеви во Анкара во периодот од 1 до 15 јули. Дополнително, ќе бидат инсталирани нови камери за надзор на стотина критични локации, а по трасите по кои ќе се движат делегациите ќе бидат користени системи за препознавање лица.
Дел од државните службеници во централните општини на Анкара ќе бидат ослободени од работа за време на самитот, додека за приватниот сектор во безбедносната зона се разгледува можноста за работа од далечина.
Американскиот државен секретар Марко Рубио потврди дека претседателот Доналд Трамп ќе присуствува на самитот, кој го оцени како „најважен состанок во историјата на НАТО“, наведувајќи дека Алијансата треба да расчисти повеќе прашања поврзани со распределбата на обврските и идната стратегија.
Самитот во Анкара се одржува во време на зголемени безбедносни тензии на Блискиот Исток, продолжување на војната во Украина и растечки дебати за улогата и иднината на НАТО.