Северна Кореја ја отфрли американската политика за денуклеаризација, оценувајќи дека барањата на Вашингтон за откажување од нуклеарното оружје се нереални и немаат никаква правна сила.
Ким Јо Џонг, влијателната сестра на севернокорејскиот лидер Ким Џонг Ун, изјави дека Пјонгјанг ќе продолжи со зајакнување на својот нуклеарен арсенал како одговор на, како што рече, заканите предводени од Соединетите Американски Држави.
„Некои функционери во САД сè уште не се разбудиле од својот застарен и нереален сон“, изјави Ким Јо Џонг, коментирајќи ги американските повици за денуклеаризација на Северна Кореја.
Нејзината изјава следува по тврдењата на Вашингтон дека американскиот претседател Доналд Трамп и кинескиот претседател Си Џинпинг на неодамнешната средба во Пекинг ја потврдиле заедничката цел за денуклеаризација на Корејскиот Полуостров.
Пјонгјанг ги отфрли тие наводи како „неточни информации“ и повтори дека неговиот статус на нуклеарна држава е неповратен.
Изјавата доаѓа во пресрет на посетата на Си Џинпинг на Северна Кореја, што ќе биде негова прва посета на земјата по седум години. Се очекува кинескиот лидер да разговара со Ким Џонг Ун за безбедносните прашања во регионот и за продлабочување на билатералните односи.
Во последните недели севернокорејскиот лидер најави забрзано проширување на нуклеарните капацитети на земјата. При посетата на нов погон за производство на нуклеарни материјали, Ким Џонг Ун порача дека нуклеарните сили на Северна Кореја ќе се зголемуваат со „експоненцијално темпо“.
Државните медиуми во Пјонгјанг објавија и дека Ким посетил фабрика за производство на оружје, каде побарал капацитетите за производство на ракети да се зголемат за два и пол пати во рамки на актуелниот петгодишен план.
Преговорите меѓу Северна Кореја и САД за ограничување на нуклеарната програма се во застој од пропаѓањето на разговорите меѓу Ким Џонг Ун и Доналд Трамп во 2019 година. Аналитичарите сметаат дека Пјонгјанг се стреми кон меѓународно признавање како нуклеарна сила, што би му овозможило да бара олеснување или укинување на меѓународните санкции.