Владата останува на ставот дека новиот клинички центар во Скопје треба да се гради на локацијата кај Спортскиот центар „Борис Трајковски“, а во тек се преговори за преземање на земјиштето предвидено за реализација на проектот, изјави премиерот Христијан Мицкоски.
Тој рече дека парцелата е во приватна сопственост и дека Владата разговара со сопственикот за можноста да се изврши размена на земјиште.
„Дефинитивно остануваме на ставот дека Клиничката болница во Скопје треба да се гради на платото пред базенот ‘Борис Трајковски’. Преговараме со приватниот сопственик и сакаме целиот комплекс со подземен тунел да биде поврзан со болницата ‘8 Септември’“, изјави Мицкоски на брифинг со новинарите.
Според него, во рамки на идниот здравствен комплекс би биле интегрирани и ПЕТ-центарот и Поликлиниката „Букурешт“, со што би се создала единствена здравствена целина.
Премиерот оцени дека локацијата кај ГОБ „8 Септември“ е најсоодветна за изградба на нов клинички центар, пред сè поради постојната сообраќајна инфраструктура и можноста за функционално поврзување на повеќе здравствени установи.
Мицкоски додаде дека е задоволен од текот на разговорите со сопственикот на земјиштето, но не соопшти рокови за завршување на преговорите или за почеток на изградбата на проектот, кој со години се наоѓа меѓу клучните инфраструктурни приоритети во здравствениот сектор.