Сашо Клековски, актуелниот директор на Фондот за здравствено осигурување, ќе биде новиот министер за здравство во рамки на претстојната реконструкција на Владата, дознава Инбокс7 од повеќе високи политички извори запознаени со преговорите.
Според истите извори, на актуелниот министер за здравство Азир Алиу му било понудено да го преземе Министерството за односи меѓу заедниците, но тој не ја прифатил понудата.
Изворите велат дека ниту Изет Меџити, ниту Билал Касами, двајцата ко-претседатели на ВЛЕН, не покажале интерес партијата да го задржи ресорот здравство, кој се смета за еден од најзначајните и политички најчувствителни ресори во Владата. Уште повеќе што досегашниот министер Алиу во интерните анкети се појавувал како најуспешен министер, веднаш зад премиерот Христијан Мицкоски.
Овој развој, според соговорници од владејачката коалиција, предизвикал разочарување и демотивираност кај дел од структурите на ВЛЕН што доаѓаат од Алијансата за Албанците, кои сметале дека задржувањето на Министерството за здравство претставува важен политички и институционален интерес.
Во меѓувреме, ВЛЕН ќе го преземе и ресорот култура, но процесот на избор на кандидат се соочил со сериозни внатрешни несогласувања. Според информациите на Инбокс7, до последниот момент не било постигнато согласување за кандидатот поради разлики меѓу Билал Касами и влијателниот пратеник Аднан Азизи.
За Министерството за правда, пак, ВЛЕН ќе го номинира универзитетскиот професор Јетон Шасивари, велат изворите.
Официјална потврда за кадровските решенија засега нема, а се очекува конечните предлози да бидат формализирани утре. Според политички извори, реконструкцијата има за цел да ја консолидира владејачката коалиција и да ја редефинира распределбата на ресорите пред почетокот на новиот политички циклус.