Лидерите на земјите учеснички во Процесот за соработка во Југоисточна Европа (ПСЈИЕ) ја усвоија Софиската декларација на самитот во Софија, одбележувајќи 30 години од воспоставувањето на иницијативата и потврдувајќи ја посветеноста на регионалната соработка, стабилноста, безбедноста и одржливиот развој.
На самитот беше одобрен и Годишниот извештај на Советот за регионална соработка (RCC), како и Среднорочната ревизија на Стратегијата SEE2030, со што лидерите ја потврдија поддршката за улогата на RCC во унапредувањето на регионалната соработка, европската интеграција и спроведувањето на заедничките политики.
Генералниот секретар на RCC, Амер Капетановиќ, изјави дека регионот располага со воспоставени механизми за соработка и широка поддршка за заеднички иницијативи, но предупреди дека демографските промени, продуктивноста и отпорноста претставуваат клучни предизвици кои бараат координиран пристап.
„Пред триесет години ПСЈИЕ помогна да се воспостави навика за дијалог. Денес треба да помогне да се изгради навика за стратешко испорачување резултати“, рече Капетановиќ.
Во декларацијата, лидерите ја нагласија важноста на инклузивната регионална соработка, добрососедските односи и економската интеграција преку Заедничкиот регионален пазар, оценувајќи дека тие претставуваат важен чекор кон интеграција во Единствениот пазар на Европската унија.
Учесниците ја потврдија и европската перспектива на земјите од регионот кои се стремат кон членство во ЕУ, нагласувајќи дека процесот на проширување останува значаен фактор за стабилноста и развојот на Југоисточна Европа.
Лидерите го поздравија придонесот на RCC како оперативна структура на ПСЈИЕ и повикаа на натамошно зајакнување на соработката меѓу двете организации во поддршка на европските аспирации на земјите од регионот.
Самитот заврши со официјално предавање на претседавањето со ПСЈИЕ од Бугарија на Романија, која во следните дванаесет месеци ќе ја координира регионалната агенда.