Советот за регионална соработка (RCC), во партнерство со Сојузното министерство за европски и меѓународни прашања на Австрија (BMEIA), ги отвори номинациите за Наградата „Шампион на регионалната соработка – Д-р Ерхард Бусек“ за 2025 година.
Организаторите ја повикуваат јавноста да предложи поединци и организации кои со својата работа придонеле за зајакнување на регионалната соработка, дијалогот и европската интеграција во Југоисточна Европа.
Наградата го носи името на покојниот Ерхард Бусек, еден од најистакнатите промотори на регионалната соработка на Балканот, а се доделува за визија, лидерство и долгорочна посветеност во градењето на поповрзан, постабилен и попросперитетен регион.
Признанието беше воспоставено од RCC во 2013 година, а од 2022 година се доделува заеднички со австриското Министерство за европски и меѓународни прашања.
За наградата можат да бидат номинирани поединци и организации за животно дело или за иницијатива што значително придонела за регионалната соработка. Кандидатите треба да покажат конкретно влијание преку активности поврзани со регионалниот развој, европската интеграција, промоцијата на Југоисточна Европа, социо-економската инклузија или други одржливи придобивки за регионот, притоа почитувајќи ги принципите на човековите права, еднаквоста, транспарентноста и недискриминацијата.
Минатогодишен добитник беше Agelast Podcast, кој беше награден за создавање платформа што поттикнува отворен дијалог, културна размена и меѓусебно разбирање во регионот. Меѓу претходните лауреати се Сараевскиот филмски фестивал, EXIT Festival, Младинските спортски игри и No Borders Orchestra.
Добитникот ќе ја понесе титулата „Шампион на регионалната соработка“, ќе добие регионално и меѓународно признание, како и парична награда од 10.000 евра.
Номинации може да поднесе секој, при што идентитетот на предлагачот останува анонимен. Пријавите треба да содржат образложение за придонесот на кандидатот и соодветна документација.
Победникот ќе го избере независно жири по претходна евалуација спроведена од заедничка комисија на RCC и BMEIA.
Номинациите се отворени до 13 септември 2026 година и може да се поднесат преку посебниот онлајн формулар за пријавување, достапенТУКА.