Премиерот Христијан Мицкоски и српскиот премиер Ѓуро Мацут на средбата во Охрид разговараа за продлабочување на билатералната соработка, инфраструктурното поврзување и заедничките проекти што треба да придонесат за економски развој и стабилност во регионот.
Мицкоски соопшти дека на тет-а-тет средбата биле разменети мислења за актуелните регионални предизвици, економските односи и можностите за унапредување на заедничките иницијативи.
„Ја потврдивме заедничката определба за натамошно унапредување на пријателските односи, засновани на меѓусебна почит, добрососедска соработка и заеднички интерес за стабилен и просперитетен регион“, напиша Мицкоски на Фејсбук.
Српскиот премиер Ѓуро Мацут изјави дека Србија и Македонија имаат најголем потенцијал за соработка во транспортот, инфраструктурата, енергетското поврзување, земјоделството и туризмот.
Според него, посебно внимание било посветено на модернизацијата на железничката врска меѓу Србија, Македонија и Грција, која треба да овозможи побрз транспорт на патници и стоки кон грчките пристаништа.
Мацут рече дека е разговарано и за изградба на гасен интерконектор, како и за можностите соработката да се прошири и со нафтена инфраструктурна врска меѓу двете земји.
Во земјоделството, двајцата премиери разговарале за олеснување на трговијата со млеко и млечни производи, додека во сообраќајот било констатирано дека редовната авионска линија Белград–Охрид претставува добра основа за натамошно зголемување на туристичката и деловната размена.
„Република Северна Македонија заслужува да биде наш прв економски партнер и важно регионално сообраќајно јазол“, изјави Мацут, додавајќи дека двете влади ќе продолжат со редовни контакти и реализација на заедничките проекти.
По тет-а-тет средбата, делегациите на двете земји одржаа работен ручек во Охрид. Во српската делегација беа и министри задолжени за енергетика, градежништво и земјоделство.