Photograph: Marc Asensio Clup S/Jna P/Nexpher/ZUMA Press Wire/Shutterstock
Најмалку 12 лица загинаа, а шестмина се повредени во голем шумски пожар што избувна во провинцијата Алмерија во јужна Шпанија, соопшти регионалната влада на Андалузија.
Пожарот избувнал во близина на Лос Гаљардос и брзо се проширил кон селото Бедар, каде се регистрирани сите жртви. Властите соопштија дека меѓу повредените има жена со изгореници и едно лице кое било хоспитализирано поради вдишување чад, додека уште четворица биле згрижени на местото на настанот.
Околу 150 пожарникари се обидуваат да го стават пожарот под контрола, а во операцијата треба да се приклучи и шпанската Воена единица за вонредни состојби.
Властите засега не ја утврдија причината за пожарот, но очевидци изјавиле дека огнот можеби започнал откако паднал далновод, кој ја запалил сувата вегетација пред пламените јазици брзо да се прошират низ шумата.
Поради пожарот беа затворени патишта, а десетици жители беа евакуирани. Околу 50 лица се сместени во локален културен центар.
Претседателот на регионалната влада на Андалузија, Хуанма Морено, изрази сочувство до семејствата на загинатите, нарекувајќи ја несреќата „трагедија“.
Пожарот избувна во услови на силен топлотен бран што ја зафати Шпанија, каде во делови од Андалузија се на сила портокалови предупредувања поради екстремно високи температури.
Шпанија во последните години се соочува со сè почести и поразорни шумски пожари, поттикнати од долготрајните суши и екстремните горештини. Според Европскиот информативен систем за шумски пожари (EFFIS), во 2025 година во земјата изгореле повеќе од 393.000 хектари, што претставува најтешка сезона на пожари во поновата историја на Шпанија.