Новиот британски премиер Енди Барнам во понеделникот најави дека неговата влада од вторник ќе започне со мерки за ублажување на кризата со животните трошоци, како дел од поширок десетгодишен план за реформи.
Во првото обраќање пред Даунинг стрит 10, Барнам изјави дека Велика Британија има потреба од „нов почеток“ и најави пренесување на поголем дел од политичката и економската моќ од Вестминстер кон регионите.
Тој вети дека ќе работи на намалување на трошоците за живот, изградба на повеќе социјални станови и искоренување на бездомништвото, кое го нарече свој прв приоритет.
Барнам рече дека во наредните денови ќе го претстави десетгодишниот план за развој и ќе објасни како ќе се финансираат најавените мерки.
Новиот премиер исто така потврди дека британската поддршка за Украина ќе остане „цврста и непоколеблива“, додавајќи дека меѓу неговите први разговори со странски лидери ќе бидат оние со американскиот претседател Доналд Трамп и украинскиот претседател Володимир Зеленски.
Подоцна во текот на денот се очекува Барнам да го формира новиот владин кабинет, по оставката на неговиот претходник Кир Стармер.