Европската унија предупреди дека секој мировен договор за Украина не смее да му овозможи на рускиот претседател Владимир Путин да избегне одговорност за наводните воени злосторства, по сигналите дека администрацијата на американскиот претседател Доналд Трамп разгледува отстапки кон Москва.
Еврокомесарот за правда и демократија, Мајкл Мекграт, во интервју за „Политико“ изјави дека преговорите за прекин на огнот мора да гарантираат дека Русија ќе се соочи со правна одговорност.
„Историјата нема благо да ги оцени обидите да се избрише листата на руските злосторства во Украина,“ рече Мекграт. „Допуштањето на неказнивост би ги посеало семињата за нова агресија. Тоа би била историска грешка од огромни размери.“
Загриженоста во европските престолнини произлегува од првичната американска рамка за мировен договор, која наводно вклучувала можност за „целосна амнестија за делата сторени за време на војната“ и мерки за реинтеграција на Русија во глобалната економија.
Меѓународната заедница ја обвинува Русија за сериозни прекршувања, меѓу кои присилно одведување на околу 20.000 украински деца и напади врз цивили во Буча, Мариупол и други градови. Украинските власти велат дека отвориле истраги за повеќе од 178.000 наводни руски злосторства од почетокот на инвазијата во 2022 година.
Минатиот месец, комисија на Обединетите нации утврди дека руските власти извршиле злосторства против човештвото преку напади со дронови врз цивили, како и воени злосторства на присилно префрлање и депортација на население. Меѓународниот кривичен суд во 2023 година издаде налог за апсење за Путин за „незаконска депортација на население (деца)“.
И покрај тоа, Трамп јавна поддржува подобрување на односите со Москва и редовно го опишува Путин во позитивен контекст, нагласувајќи дека има „добри разговори“ со него. Двајцата, според објавите, дури разговарале и за организирање хокеарски натпревари по завршувањето на конфликтот.
Нацрт-планот за мир од 28 точки, што минатата недела го циркулираше американската страна, предвидува Русија да биде повторно интегрирана во светската економија и повторно поканета во Г8, групата од која беше исфрлена по анексијата на Крим во 2014 година. Планот исто така предвидува долгорочни договори за економска соработка во енергетиката, инфраструктурата, вештачката интелигенција и рударството.
Вашингтон предлага постепено укинување на санкциите, но европските лидери нагласуваат дека одлуката за ЕУ санкциите ќе ја донесат исклучиво државите членки.
Неколку европски земји се воздржани кон продолжување на рестрикциите. Унгарија повеќепати блокираше нови санкции, особено за енергенси од кои е зависна, а во Германија се појавија гласови за разгледување укинување на ограничувањата за гасоводот „Северен тек“.