Иранскиот министер за надворешни работи Абас Арагчи изјави дека смртоносниот украински напад врз ирански трговски брод во Каспиското Море „не може да остане без одговор“, оценувајќи дека станува збор за кршење на Повелбата на Обединетите нации.
Во објава на социјалните мрежи, Арагчи го обвини Израел дека го поттикнал нападот со цел да ја вовлече Европа во конфликтот со Иран. Тој соопшти дека за инцидентот разговарал со шефицата на европската дипломатија Каја Калас и со рускиот министер за надворешни работи Сергеј Лавров.
Според иранското Министерство за надворешни работи, при украинскиот напад во саботата трговскиот брод експлодирал, при што загинал еден морнар, а неколкумина биле повредени.
Украина, пак, соопшти дека цел бил руски воен брод и пловни објекти што се користеле за транспорт на воен товар поврзан со Иран. Техеран ги отфрли таквите тврдења, нагласувајќи дека никогаш не бил вклучен во војната меѓу Русија и Украина.
Претседателот на Комисијата за национална безбедност и надворешна политика на иранскиот парламент, Ебрахим Азизи, предупреди дека Украина би можела да се соочи со последици.
„Секој напад врз Иран има цена. Украина наскоро може да сфати дека Иран не остава вакви дејствија без одговор“, напиша Азизи на платформата Икс.
Иран во меѓувреме го повика украинскиот вршител на должноста амбасадор во Техеран за да му врачи протест поради, како што наведе, „непријателскиот и криминален чин“.
Украинскиот претседател Володимир Зеленски претходно соопшти дека украинските сили постигнале „многу силни резултати“ со нападите со долг дострел во Каспиското Море, вклучително и врз бродови што превезувале воен товар поврзан со Иран и врз руски воен брод.
Рускиот министер за надворешни работи Сергеј Лавров изрази сочувство за загинатиот морнар и ја нагласи потребата, како што соопшти руското Министерство за надворешни работи, „да се стави крај на ваквите авантури на режимот во Киев“. Според Москва, Арагчи истовремено информирал за дипломатските напори насочени кон намалување на тензиите на Блискиот Исток.