ВЛЕН ја обвини ДУИ дека шири пропаганда околу процесот на обединување на партиите од коалицијата во единствен политички субјект, тврдејќи дека постапката се спроведува во фази и во согласност со законите.
„На ДУИ ѝ поминаа две децении на власт, во тендери и кражби, па изгледа не ѝ остана време да ги научи законите“, се наведува во соопштението на ВЛЕН. Станува збор за политички обвинувања на коалицијата за кои во соопштението не се понудени докази.
Реакцијата следува по критиките од ДУИ поврзани со статусот на партиите што го сочинуваат ВЛЕН. Од коалицијата велат дека откако, како што наведуваат, „не им поминала приказната за Беса“, од ДУИ сега се фокусирале на Алтернатива.
ВЛЕН истовремено ја прозва ДУИ околу нејзиното раководство, прашувајќи дали партијата „навистина ја води Али Ахмети, Бујар Османи или Артан Груби од куќен притвор“.
Од ВЛЕН велат дека на локалните избори не настапиле како регистрирана единствена политичка партија.
Според коалицијата, со победата во десет општини, партиите што тогаш го сочинувале ВЛЕН стекнале конкретни права и обврски кои произлегуваат од изборниот процес.
„Токму поради тоа, преминувањето на петте политички фактори во ВЛЕН како единствена партија се одвива во фази, во согласност со законите и процедурите утврдени со регулативата“, соопшти ВЛЕН.
Од коалицијата ги отфрлаат обвинувањата за можни неправилности во процесот на обединување.
„Тука нема никаква тајна и никаква измама. Има само законска процедура, која ДУИ или не ја разбира или намерно се преправа дека не ја разбира за да произведува евтина пропаганда“, се наведува во реакцијата.
ВЛЕН ги посочува Алтернатива, Беса, Демократското движење, Алијансата за Албанците и Самоопределување како политички фактори кои, според коалицијата, придонеле за изборниот пораз на ДУИ.
„Алтернатива, Беса, Демократското движење, Алијансата за Албанците и Самоопределување засекогаш ќе останат во меморијата на албанскиот народ како политички фактори кои ја победија ДУИ“, се наведува во соопштението.
ВЛЕН додава дека ќе работи актуелното раководство на ДУИ да го испрати во „трајна политичка пензија“, нарекувајќи го „нереформирано раководство кое функционира како политбиро“.