Продолжената вулканска активност на Етна го затвори аеродромот „Винченцо Белини“ во Катанија, најпрометниот на Сицилија, откако облаци од вулканска пепел го направија воздушниот сообраќај небезбеден.
Аеродромските власти соопштија дека летовите ќе останат суспендирани најмалку до 14 часот по локално време во сабота. Станува збор за најголемото нарушување на работењето на аеродромот поради Етна во повеќе од две децении.
Од минатиот четврток до средата оваа недела биле откажани повеќе од една третина од вкупно 1.974 планирани летови, а околу 600 други биле пренасочени кон други аеродроми.
Етна, највисокиот и најактивен вулкан во Европа, се наоѓа околу 30 километри северно од Катанија, поради што секоја посилна ерупција претставува директен ризик за авиосообраќајот.
Хаос во најфреквентната туристичка недела
Стотици патници останаа на терминалите со откажани или одложени летови во период кога туристичкиот сообраќај на Сицилија е на врвот.
Аеродромот во Катанија вообичаено опслужува најмалку 40.000 патници дневно.
Една патничка која требало да патува кон Шри Ланка преку Дубаи изјавила за Reuters дека нејзиниот прв лет бил откажан во средата, потоа бил презакажан за петок, но и тој бил откажан.
Само во четвртокот вечерта околу 300 патници чекале да бидат префрлени кон друг аеродром, објавија италијанските медиуми.
Пепелта стигнала и до Северна Африка
Вулканската пепел не останала ограничена само над Сицилија и јужна Италија, туку делови од облакот стигнале и до Северна Африка.
Поради ограничувањата во авиосообраќајот, италијанската железничка компанија Trenitalia воведе шест дополнителни возови на линијата Палермо–Месина–Катанија за да го намали притисокот врз транспортниот систем.
Патниците се советуваат пред да тргнат кон аеродромот да го проверат статусот на летот директно кај авиокомпаниите.
Нема автоматско право на надомест поради вулкан
За патниците дополнителен проблем е обесштетувањето. Иако европските правила предвидуваат компензација за големи доцнења и откажувања во одредени ситуации, вулканските ерупции вообичаено се третираат како „вонредни околности“.
Тоа значи дека авиокомпаниите најчесто немаат обврска да исплатат стандардна финансиска компензација, иако остануваат обврските за пренасочување, враќање на средствата и грижа за патниците во зависност од конкретниот случај.