Комисијата за политиките за Бугарите надвор од земјата при бугарското Народно собрание на неформална седница ја сослуша Христина Михајлова, мајка на бугарската државјанка Ива Михајлова, против која се води судска постапка во Северна Македонија.
Христина Михајлова изјави дека нејзината ќерка веќе десет месеци не може да го добие потребниот медицински третман, иако, како што наведе, според приложената медицинска документација, такво лекување не може да се спроведе во Северна Македонија. Таа рече дека Ива Михајлова има скршеници на пршлените L4 и L5 и предупреди дека одложувањето на лекувањето носи ризик од траен инвалидитет.
Пред членовите на комисијата, Михајлова ги оспори доказите и текот на судската постапка. Според неа, 14 сведоци биле сослушани, но ниту еден не изјавил дека видел како Ива Михајлова навлегла во спротивната коловозна лента. Таа додаде дека единствениот очевидец на судирот изјавил оти нејзината ќерка се движела во својата лента.
Михајлова изрази сомнеж и во увидот на местото на несреќата, како и во автотехничките вештачења, наведувајќи дека трите експертизи дошле до различни заклучоци за причините за сообраќајната несреќа.
И покрај критиките, таа нагласи дека очекува судската одлука да биде донесена независно и предупреди дека активностите на бугарските институции не треба да се толкуваат како политички притисок врз македонскиот суд.
Директорот на Дирекцијата за конзуларни односи во бугарското Министерство за надворешни работи, Николај Ванчев, изјави дека Бугарија од самиот почеток ѝ обезбедува конзуларна помош на Ива Михајлова, при што, како што рече, дипломатските претставници го почитуваат принципот на немешање во судската постапка, но обезбедуваат целосна конзуларна поддршка во согласност со меѓународното право.