Министерството за внатрешни работи на Албанија ги прогласи за непожелни лица Валон Бела и Бекир Халими, двајца државјани на Северна Македонија, по предлог на структурите за борба против тероризмот, објавија во вторникот албанските медиуми.
Според медиумските извештаи, албанските безбедносни служби располагаат со информации за наводни активности на двајцата што би можеле да претставуваат ризик за безбедноста и интересите на Албанија. Властите досега не објавија конкретни детали за природата на сомнежите, доказите врз кои се темели одлуката или времетраењето на забраната за влез.
Бела е политички активист од Северна Македонија, додека Халими е исламски теолог и имам. Во дел од албанските медиуми Бела беше претставен како активист на Движењето Беса.
Халими: Немам официјална потврда
Халими изјави дека сè уште не добил официјално известување и дека информацијата ќе ја проверува преку Амбасадата на Северна Македонија во Тирана.
Тој рече дека неговата последна активност во Албанија била соработка со регионот Скадар во проект за меѓународна промоција на земјата, додавајќи дека очекува да добие и албанско државјанство.
Халими ги отфрли наводите дека бил поврзан со домашни или меѓународни организации и рече дека неговиот единствен институционален претставник е Исламската верска заедница во Северна Македонија.
Тој наведе и дека учествувал во конфликтите на ОВК во Косово и во Македонија во периодот од 1998 до 2001 година, тврдејќи дека неговото дејствување било поврзано со, како што рече, ослободителните борби.
Бела: Одлуката е политичка
Бела, исто така, ја оспори одлуката и ја оцени како политичка и неправедна.
Во објава на Фејсбук тој рече дека една административна мерка не може да ги избрише неговата историја, жртва и придонес. Тој го обвини албанскиот премиер Еди Рама за исклучувачка политика и го спореди со српскиот претседател Александар Вучиќ.
„Достоинството на еден борец не се мери со правото да влезе или да не влезе во една држава, туку со делото што го оставил зад себе и со почитта што ја ужива кај народот“, напиша Бела, според објавената реакција.
Тој тврдеше дека одлуката на Тирана се совпаѓа со претходни мерки преземени против него од страна на Србија.
Нема јавно образложение
До објавувањето на информацијата, албанските институции немаа објавено јавно и детално образложение за конкретните активности што им се ставаат на товар на Бела и Халими.
Не е познато ниту дали двајцата ќе имаат можност да поднесат жалба, дали забраната е временски ограничена и дали одлуката се однесува само на влез во Албанија или и на транзит низ нејзината територија.
Во медиумските извештаи се наведува дека одлуката била потпишана по информации доставени од разузнавачките и антитерористичките структури. Албанското Министерство за внатрешни работи претходно прогласи и други лица за непожелни врз основа на процени за националната безбедност.
Со Бела и Халими, бројот на лица прогласени за непожелни во Албанија се искачи на три, откако пред еден месец на „црната листа“ беше ставена и една вработена во Општина Тетово.