Србија ќе продолжи да го поддржува територијалниот интегритет на Украина и нејзиниот пат кон Европската унија, изјави претседателот Александар Вучиќ во саботата по средбата со украинскиот претседател Володимир Зеленски во Белград.
Зеленски, кој допатува во својата прва официјална посета на Србија, му се заблагодари на Белград за поддршката на независноста и територијалниот интегритет на Украина и за новиот пакет хуманитарна помош.
„Србија, и јас како нејзин претседател, ја поддржуваме Повелбата на ОН, што значи територијален интегритет на сите земји членки на ОН, а тоа значи и територијален интегритет на Украина“, рече Вучиќ на заедничката прес-конференција.
„Ќе продолжиме да водиме таква принципиелна политика и по тоа прашање не постои никакво ‘но’“, додаде тој.
Србија, која е кандидат за членство во Европската унија, од почетокот на руската инвазија го поддржува територијалниот интегритет на Украина, но одржува односи со Москва и не се приклучи кон санкциите на ЕУ против Русија.
Вучиќ рече дека Белград ќе го поддржи и напредокот на Украина кон ЕУ.
„Ние сакаме Украина што е можно побрзо да ги отвори сите кластери и што е можно побрзо да ги затвори“, рече Вучиќ, додавајќи дека Србија ќе направи сè што може за да ѝ помогне на Украина на европскиот пат.
Зеленски му се заблагодари на Вучиќ за поддршката.
„Ви благодарам за поддршката на украинскиот народ, независноста и територијалниот интегритет. Ние тоа длабоко го цениме“, рече Зеленски.
Украинскиот претседател соопшти дека во руските напади во претходните 24 часа загинале 13 лица, а 77 биле повредени во 12 региони на Украина.
„Немаме ниту една електрана што не била нападната“, рече Зеленски, додавајќи дека руските напади се насочени кон енергетската инфраструктура, железницата, болниците и други објекти неопходни за секојдневниот живот.
Тој му се заблагодари на Белград за новиот пакет хуманитарна помош, особено во здравството и енергетиката.
Двајцата претседатели разговарале и за проширување на економските односи, инфраструктурата, енергетиката, земјоделството и учеството на српски компании во идната обнова на Украина.
Зеленски рече дека Белград и Киев работат и на договор за слободна трговија.
„Би било навистина добро сè да подготвиме до крајот на оваа година за да можеме да склучиме договор за слободна трговија меѓу Украина и Србија“, рече Зеленски.
Вучиќ изјави дека трговската размена меѓу двете земји минатата година изнесувала околу 450 милиони долари, додека само во првите шест месеци од 2026 година достигнала околу 321 милион долари.
Двајцата лидери разговарале и за можностите за дипломатско завршување на војната.
„Ние сакаме достоинствен мир и треба да се искористи секоја можност за мир и гарантирање на безбедноста“, рече Зеленски.
За време на посетата беше потпишан и меморандум за соработка меѓу Србија и Украина во областа на здравјето на животните и безбедноста на храната.
Вучиќ и Зеленски претходно се среќаваа на меѓународни форуми и самити, но ова е прва официјална посета на украинскиот претседател на Србија.