ДУИ во понеделникот соопшти дека од јуни 2024 година досега ниту еден од албанските функционери на позицијата прв вицепремиер не претседавал со седница на Владата, оценувајќи дека тоа покажува колкаво е нивното реално влијание во извршната власт.
„Изет Меџити – 0 седници. Беким Сали – 0 седници. Арбен Фетаи – 0 седници. Вкупно: нула“, наведе опозициската партија.
Според ДУИ, позицијата прв вицепремиер може да има кабинет, протокол и други формални обележја, но нејзината политичка тежина треба да се мери според учеството во носењето одлуки.
„Ако повеќе од две години не ти е доверено водењето ниту на една седница на Владата, тогаш е легитимно да се постави прашањето: што е ‘прв’ во оваа функција?“, соопшти ДУИ.
Партијата оцени дека во претходните влади функцијата вицепремиер била „реален политички и институционален механизам на совладеење“, додека сега, според неа, е сведена на „декор“.
Меѓутоа, медиуми блиски до ВЛЕН, повикувајќи се на јавно достапна објава на Фејсбук, објавија дека поранешниот прв вицепремиер Изет Меџити претседавал со владина седница на 11 јули 2024 година.