Политичката конфронтација меѓу владејачката ВЛЕН и опозициската Демократска унија за интеграција се продлабочи со нова размена на обвинувања околу правичната застапеност, Охридскиот рамковен договор и положбата на Албанците во институциите.
ВЛЕН ја обвини ДУИ дека со години го користела прашањето за правата на Албанците за партиски и лични интереси, а сега, откако е во опозиција, се обидува да ги блокира процесите што не ги контролира.
„ДУИ не ја брани албанската кауза, туку ја држи во заложништво. Нивната пресметка е едноставна: или тие ќе бидат во фотелјите или ништо нема да функционира“, соопшти ВЛЕН.
Од коалицијата велат дека Албанците немаат обврска постојано да им обезбедуваат функции на политичари кои со години биле дел од власта.
„Албанците не им должат вечна власт на функционерите од Мала Речица. Не им должат министри, директори или тендери, а уште помалку им дале право, само затоа што останале без функции, да го блокираат Законот за правична застапеност и да го поткопуваат Охридскиот рамковен договор“, се наведува во реакцијата.
Според ВЛЕН, ДУИ во изминатите 25 години имала можност правичната и соодветна застапеност да ја регулира со закон, но не го сторила тоа.
„Имаа целосна политичка моќ, но поважни им беа тендерите, личното богатење и политичките пазари. Сега, кога некој друг се обидува да ја заврши работата, се закануваат дека ќе го блокираат целото Собрание“, соопшти ВЛЕН.
ДУИ возврати дека ВЛЕН го измамил албанскиот електорат и, иако ги загубил изборите во албанскиот политички блок, прифатил да стане владин партнер на ВМРО-ДПМНЕ.
„ВЛЕН за време на изборите ветуваше дека, дури и да му недостига само еден глас за победа, нема да стане дел од Владата. Денес се случи токму спротивното. Како изборен губитник, ВЛЕН влезе во Владата и речиси за секое ветување дадено пред Албанците постапи во обратна насока“, соопшти ДУИ.
Опозициската партија тврди дека во последните две години е зголемено влијанието на политичкиот концепт што го нарекува „српски свет“.
Според ДУИ, ваквите тенденции биле регистрирани и во извештаи на Европскиот парламент, во кои, како што наведува партијата, се посочува улогата на претставници на власта во промовирањето на таквите политики.
„Ова веќе не се само оценки на опозицијата, туку наоди на значајни европски институции“, соопшти ДУИ.
Партијата ја обвини ВЛЕН дека не е пасивен набљудувач, туку активен учесник во политиките што, според неа, ги ослабуваат колективните права на Албанците.
„Паралелно со ова влијание продолжува систематското разградување на Охридскиот рамковен договор преку одлуки на Уставниот суд и политики на влада без етнички легитимитет. ВЛЕН во тој процес не е набљудувач, туку служи за прикривање, релативизирање и спроведување на политиките што ги загрозуваат колективните права на Албанците“, соопшти ДУИ.