ВЛЕН ја обвини ДУИ дека избегнува политичка одговорност за резултатите од локалните избори и оцени дека евентуални предвремени парламентарни избори дополнително ќе ја ослабнат партијата на Али Ахмети.
Во соопштението, ВЛЕН наведува дека пред ДУИ да бара нови избори треба да објасни зошто, според нив, никој од раководството не понел политичка одговорност по поразите на локалните избори.
„Измамниците од ДУИ, пред да ја отворат устата за избори, треба да објаснат зошто никој во нивната партија не презеде политичка одговорност по поразот на локалните избори“, се наведува во реакцијата.
ВЛЕН посочува на повеќе високи функционери на ДУИ, меѓу кои Бујар Османи, Бајрам Реџепи и Фатон Ахмети, тврдејќи дека и покрај изборните резултати тие ги задржале или добиле партиските функции.
„Али Ахмети продолжи да продава магла со стариот трик со повлекувањето, Бујар Османи го загуби Чаир и остана потпретседател и главен играч за тронот на ДУИ, Бајрам Реџепи го загуби Тетово и остана во раководството на партијата, додека Фатон Ахмети за својот изборен пораз беше награден со две нови партиски функции – потпретседател и шеф на кабинетот на Али Ахмети“, се наведува во соопштението.
„Во ДУИ, очигледно, нема одговорност за поразот, туку губитниците се наградуваат“, додава ВЛЕН.
Коалицијата тврди дека слична ситуација имало и во Арачиново, Боговиње, Теарце, Струга, Желино, Сарај и Долнени, каде, како што наведува, изборните порази не довеле до промени во партиската структура.
Реакцијата доаѓа во период на засилени шпекулации за можни предвремени парламентарни избори, откако премиерот Христијан Мицкоски порача дека власта е подготвена за избори доколку опозицијата ги побара. ДУИ веднаш го прифати предизвикот и побара распуштање на Собранието и утврдување датум за гласање.
ВЛЕН оценува дека повиците на ДУИ за предвремени избори се обид за одржување на мобилизацијата во партијата и создавање очекување за брзо враќање на власт.
„Разговорите за легитимитет и барањата за предвремени избори се само за домашна употреба, за истите политичари да се одржуваат во кондиција и да се продава надеж дека наскоро ќе се вратат на власт за повторно да крадат“, соопшти ВЛЕН. Партијата не понуди докази за обвинувањето за кражба.
Според ВЛЕН, ДУИ е свесна дека ново изборно соочување би можело дополнително да ја ослаби нејзината позиција меѓу албанските гласачи.
„На следните избори граѓаните ќе ја завршат работата и ова нереформирано раководство, кое функционира како политбиро, ќе го испратат директно во политичка пензија“, се наведува во соопштението.