Северна Македонија нема да се откаже од членството во Европската Унија, но очекува пристапниот процес да се темели на заслуги и мерливи критериуми, наместо билатералните прашања да создаваат нови услови, порача премиерот Христијан Мицкоски во обраќањето пред Генералното собрание на Обединетите нации.
Во говорот на 81. заседание на Генералното собрание, Мицкоски рече дека ЕУ останува природен политички, економски и институционален дом на земјата, и покрај долгиот и тежок пристапен процес.
„Нема да се откажеме од европската идеја затоа што европскиот пат беше тежок“, рече Мицкоски.
Премиерот истовремено призна дека дел од причините за бавното приближување кон ЕУ треба да се бараат дома, наведувајќи ги владеењето на правото, ефикасноста на институциите, конкурентноста на економијата и довербата на граѓаните во државата како области во кои се потребни дополнителни резултати.
„Тоа е наша одговорност и нема да ја префрлиме на Брисел“, рече тој.
„Не бараме пониски стандарди“
Мицкоски, сепак, побара од ЕУ процесот на проширување да биде предвидлив и кандидатите да напредуваат кога ги исполнуваат поставените критериуми.
„Не бараме полесен пат. Бараме пат уреден со правила. Не бараме пониски стандарди. Бараме стандардите да останат стандарди“, рече премиерот.
Тој повторно го отвори прашањето за влијанието на билатералните спорови врз македонската евроинтеграција, оценувајќи дека довербата во процесот се намалува доколку условите се менуваат или нивното исполнување не носи очекуван напредок.
„Ако од земјите кандидати се бара да исполнат конкретни критериуми, тогаш исполнувањето на тие критериуми мора да биде соодветно вреднувано“, рече Мицкоски.
Според него, во спротивно станува потешко граѓаните да продолжат да веруваат во интеграцијата, компромисите и вредноста на преземените обврски.
Пораката доаѓа среде новата размена со Софија
Говорот на Мицкоски доаѓа во период на обновена размена на пораки меѓу Скопје и Софија околу начинот на кој треба да продолжи европскиот процес.
Министерот за надворешни работи и надворешна трговија Тимчо Муцунски побара во идните разговори со Бугарија поврзани со евроинтеграцијата да има присуство на ЕУ – преку европските институции или земји членки – со образложение дека тоа би помогнало во градењето доверба.
Од Софија следуваа повеќе реакции.
Бугарското Министерство за надворешни работи порача дека пристапувањето на Северна Македонија е европско прашање што треба да се разгледува во европските институции и според утврдените правила и процедури.
Бугарскиот европратеник Кристијан Вигенин, кој учествуваше на состанокот на Заедничкиот парламентарен комитет ЕУ – Северна Македонија во Скопје, рече дека на двете земји не им е потребен посредник бидејќи прашањето за евроинтеграцијата веќе не е билатерално.
Бугарскиот копретседател на Историската комисија Ангел Димитров, пак, ја опиша идејата за посредник како политички предлог.
Така, во рок од неколку дена се исцртаа двете позиции: Скопје бара поголема предвидливост и дополнително европско присуство во разговорите со Софија, додека бугарската страна се повикува на веќе договорената европска рамка и исполнување на преземените обврски.
За Мицкоски, пораката од говорницата на ОН беше дека Северна Македонија ќе продолжи кон ЕУ, но очекува критериумите по кои се оценува нејзиниот напредок да останат јасни и непроменливи.