Три пожари на отворено вечерва се активни во Скопје и неговата околина, кај Стенковец, во Ѓорче Петров и кај Кондово, додека чад и силна миризба на изгорено се чувствуваат во повеќе делови од главниот град.
Додека пожарникарските екипи сè уште интервенираат на пожарот во близина на Стенковец, избувнале уште два пожари, соопшти директорот на Дирекцијата за заштита и спасување Стојанче Ангелов.
Едниот е на подрачјето на Општина Ѓорче Петров, а другиот кај Кондово.
Новите жаришта дополнително ги оптоваруваат противпожарните екипи, кои веќе неколку дена интервенираат на повеќе локации во Скопскиот Регион и низ земјата.
Скопје повторно под чад
Густ чад и миризба на изгорено вечерва се чувствуваат во повеќе скопски населби, а на социјалните мрежи граѓани објавуваат фотографии и видеа од замаглениот град.
Дел од чадот во текот на денот доаѓаше и од големиот пожар кај Рамно на Скопска Црна Гора, во Општина Чучер-Сандево.
Ангелов претходно го означи пожарот кај Рамно како најкомплексен меѓу активните пожари на отворено.
Ветрот дополнително го разнесува чадот кон градот, поради што миризбата на изгорено се чувствува и на поголема оддалеченост од самите пожари.
Над 30 пожари во еден ден
Според Ангелов, во текот на денот низ земјата биле регистрирани повеќе од 30 пожари, од кои шест во еден момент останале активни.
Освен во Скопскиот Регион, пожарникарите интервенираа и кај Милетино во Општина Брвеница, како и кај Ногаевци во Општина Градско.
Пожарот кај Милетино, кој се приближил кон селото и претставувал опасност за куќите, бил ставен под контрола по интервенција на тетовските пожарникари и два „ер-трактори“ на Дирекцијата за заштита и спасување.
Кај Ногаевци, пак, пожарот во боровата шума повторно се разгорел откако претходната вечер бил изгаснат по повеќечасовна интервенција.
Ангелов се сомнева во намерно палење
Директорот на ДЗС јавно изрази сомневање дека дел од пожарите кои повторно се појавуваат на исти или блиски локации се намерно предизвикани.
За пожарот кај Ногаевци тој изјави дека се сомнева оти „некој намерно го пали ова место“, а слични сомнежи изнесе и за повторуваните пожари кај Рамно.
Засега нема објавени резултати од истрага што би потврдиле дека конкретните пожари биле подметнати или дека зад нив стои организирано дејствување.
Пожарникарите пред тешка ноќ
Истовременото активирање на повеќе пожари во Скопскиот Регион значи дека противпожарните сили вечерва мора да бидат распределени на неколку локации.
Во изминатите денови во гаснењето, покрај пожарникарските екипи, беа вклучени хеликоптери и воздухоплови за гаснење пожари.
Најголем непосреден проблем за жителите на Скопје вечерва е чадот што ветерот го носи кон густо населените делови од градот.