Премиерот Христијан Мицкоски во четвртокот ја обвини Бугарија дека „покажува политички мускули“ во случајот со Ива Михајлова и рече дека таа нелегално ја напуштила Северна Македонија, отфрлајќи ги тврдењата на Михајлова и нејзиниот бугарски адвокат дека границата ја минале преку официјален премин.
„Апсолутно е невистина тоа што го емитуваа бугарските медиуми, односно го пласираа во јавноста, дека заедно со нејзиниот адвокат поминале на регуларен граничен премин“, рече Мицкоски.
Според него, последниот регистриран влез на адвокатот Николај Димитров во Северна Македонија бил на 28 септември, информација за која премиерот рече дека е потврдена и од бугарска страна.
МВР истражува како Михајлова ја напуштила земјата. Таа и нејзиниот адвокат претходно изјавија за бугарските медиуми дека влегле во Бугарија преку граничен премин и дека Михајлова се идентификувала со лични карти издадени од Северна Македонија и Бугарија.
Македонското МВР, пак, соопшти дека во системот на Граничната полиција нема регистрирано нејзино излегување од земјата.
Мицкоски ја заостри реториката кон Софија, оценувајќи дека начинот на кој бугарските власти постапуваат со случајот може да им нанесе меѓународна штета.
„Жалам што политичкото водство во Бугарија се обидува на овој начин да покаже политички мускули, а не ја сфаќа штетата што самото си ја прави на меѓународен план“, рече тој.
Мицкоски ја повика Бугарија да ги врати во Северна Македонија и Михајлова и нејзиниот татко Симеон Михајлов, кој живее во Бугарија и има пресуда во Северна Македонија.
„Ве гледам во очи и ви кажувам: кога-тогаш. И татко ѝ и таа ќе одговараат“, рече премиерот.
Тој ги отфрли обвинувањата на опозицијата дека заминувањето на Михајлова во Бугарија било претходно договорено меѓу Скопје и Софија.
„Ако е тоа така договорено, ние ги бараме назад и неа и нејзиниот родител. Уште денеска нека ги донесат и да видиме дали е така договорено или не“, рече Мицкоски.
Против 23-годишната Михајлова во Кочани се води судска постапка поврзана со сообраќајна несреќа со смртни последици од октомври минатата година, во која имало и други повредени, меѓу кои и таа.
По несреќата ѝ биле одземени македонскиот и бугарскиот пасош и ѝ биле определени мерки со кои било ограничено нејзиното движење и напуштање на земјата.
Откако беше утврдено дека Михајлова се наоѓа во Бугарија, судот во Кочани ѝ определи 30-дневен притвор, а македонските власти распишаа меѓународна потерница.
Нејзиното бугарско државјанство, сепак, го отвора прашањето дали Софија ќе прифати нејзина екстрадиција. Бугарските власти досега не соопштија дека е донесена конечна судска одлука за нејзино предавање на Северна Македонија.
Мицкоски, запрашан за можноста Бугарија да одбие екстрадиција поради бугарското државјанство на Михајлова, не даде конкретна правна процена и повтори дека Скопје бара таа да биде вратена.
Случајот, кој првично беше кривично-правно и здравствено прашање, во изминатите денови прерасна во нов дипломатски спор меѓу Скопје и Софија, со меѓусебни обвинувања за политизација и мешање во работата на институциите.