Група од 72 пензионирани американски генерали, адмирали и други високи воени офицери побара од американската влада да се откаже од планот во живо да ја емитува егзекуцијата на Нидал Хасан, армискиот психијатар кој во 2009 година уби 13 лица во воената база Форт Худ.
Пентагон минатата недела соопшти дека егзекуцијата со стрелачки вод, закажана за 3 декември, ќе биде јавно емитувана. Доколку планот биде реализиран, тоа би била првата јавна егзекуција во САД по речиси еден век, според Би-Би-Си.
„Го повикуваме претседателот, нашите претставници во Конгресот и нашите сограѓани да дејствуваат за да ја спречат оваа варварска злоупотреба на власта“, наведуваат поранешните воени офицери во отворено писмо.
Потписниците, меѓу кои има 45 генерали и 12 адмирали, велат дека не се против извршувањето на смртната казна на Хасан, туку против нејзиното претворање во јавен спектакл.
Според нив, директниот пренос би можел да биде во спротивност со уставната забрана за сурово и невообичаено казнување и да ја претвори „свечената и тешка казна“ во „карневал за уживање на набљудувачите и гледачите“.
Тие предупредија и дека снимките од егзекуцијата би можеле да бидат користени како пропагандна алатка против САД.
„Тоа ќе биде искористено од непријателите на нашата земја за поттикнување омраза, ќе ги загрози американските војници и граѓани во иднина и ќе обезбеди Хасан да стане маченик“, се наведува во писмото.
Меѓу потписниците се пензионираниот генерал-мајор Тони Тагуба, кој ја предводеше армиската истрага за злоупотребите на затворениците во Абу Граиб, поранешниот обвинител во Гвантанамо Мо Дејвис, поранешниот администратор на НАСА и генерал-мајор на маринците Чарлс Болден и пензионираната генерал-потполковничка Клаудија Кенеди, првата жена со чин генерал со три ѕвезди во американската армија.
Планот за директен пренос го објави американскиот секретар за одбрана Пит Хегсет и предизвика критики од политичари од двете партии, верски лидери, академици и експерти.
Претседателот Доналд Трамп минатата недела изјави дека „апсолутно“ го одобрува директниот пренос. Сепак, според Си-Би-Ес, дел од претставниците на администрацијата сега се наклонети кон откажување на емитувањето, а Трамп до вторникот сè уште немал донесено конечна одлука.
Хасан, кој работел како психијатар во американската армија, во 2009 година отвори оган во Форт Худ и уби 13 невооружени припадници на американската војска. Тој во судот изјави дека нападот го извршил бидејќи верувал дека на тој начин ги штити муслиманите и талибанците во Авганистан од американската војска.
Хасан беше застрелан при нападот и оттогаш користи инвалидска количка. Нападот во Форт Худ се смета за најсмртоносниот неборбен напад врз американска воена база.