Министерството за внатрешни работи (МВР) ќе покрене дисциплинска постапка против полициски службеник од Полициското одделение Сарај, чија службена легитимација била злоупотребена од неговиот син, против кого ќе биде поднесена и кривична пријава за насилство, соопшти МВР.
Одделот за внатрешна контрола, криминалистички истраги и професионални стандарди постапувал по пријава дека Ф.Х., син на полицискиот службеник И.А.Х., на 21 март 2025 година, управувајќи приватно моторно возило, следел друго лице. Во близина на село Смилковци и клучката Стајковци, Ф.Х. се претставил како полициски службеник, покажувајќи ја службената легитимација на својот татко.
„Ф.Х. потоа физички го нападнал лицето, кое настанот го пријавило во полициската станица“, соопшти МВР.
Секторот за внатрешни работи Скопје (СВР Скопје), во соработка со јавен обвинител, ќе поднесе кривична пријава против Ф.Х. за „насилство“ според член 386 од Кривичниот законик.
Истовремено, внатрешната контрола утврдила дека И.А.Х. постапил спротивно на законските и подзаконските акти на Министерството, дозволувајќи неговата службена легитимација да биде користена за лични цели од неговиот син.
„Против полицискиот службеник ќе биде поднесен предлог за поведување дисциплинска постапка за нарушување на работниот ред и дисциплина“, соопшти МВР.