Министерот за надворешни работи на Србија, Марко Ѓуриќ, во саботата изјави дека посетата на претседателот Александар Вучиќ на Москва за учество на воената парада по повод „Денот на победата“ нема да има последици врз евроинтегративниот процес на земјата.
„Нема да има никакви пречки за европската интеграција, ниту санкции. Тоа наскоро ќе биде јасно,“ изјави Ѓуриќ за српската јавна телевизија РТС.
Тој најави дека претседателот на Европскиот совет, Антониу Кошта, и новоименуваната висока претставничка за надворешна политика на ЕУ, Каја Калас, наскоро ќе ја посетат Србија, додавајќи дека очекува „засилување на односите со Брисел“ за време на овие средби.
Посетата на Вучиќ на Москва предизвика загриженост во европските кругови. Калас предупреди дека земјите членки „не гледаат со одобрување“ на ваква посета во време кога Русија продолжува со агресијата врз Украина. Косовските власти оценија дека присуството на Вучиќ на парадата е сигнал дека Брисел треба да ја прекине толерантната политика кон Белград.
Во остра реакција, европратеникот Рихо Терас, известувач за Косово во Европскиот парламент, изјави дека се собираат потписи за барање откажување на посетата на Кошта во Белград. „Неприфатливо е претседателот Вучиќ да учествува на настан организиран од Владимир Путин,“ напиша Терас на социјалната мрежа Икс, додавајќи дека тоа е во спротивност со вредностите што ги застапува ЕУ.
Посетата на Кошта на Западен Балкан е планирана од 12 до 16 мај и има за цел да го засили ангажманот на ЕУ во регионот. На 16 мај, тој ќе биде ко-домаќин на Самитот на Европската политичка заедница (ЕПС) во Тирана, додека на 14 мај се очекува да ја посети и Приштина за средби со претседателката Вјоса Османи.
Во интервју за „Euronews“, Кошта изјави дека „иднината на Србија е во Европа“, истакнувајќи го ангажманот на Вучиќ за формирање нова влада и спроведување на три клучни реформи: изборна реформа, слобода на медиумите и борба против корупцијата.
„Усогласувањето со надворешната политика на ЕУ останува предуслов за членство,“ додаде Кошта.